आमच्या प्लॅटफॉर्मबद्दल

आमच्या तरुण पिढीवर बेजबाबदारपणाचा, स्वार्थीपणाचा आरोप केला जातो. या बेजबाबदारपणाचे मुळ समाजातील शैक्षणिक, राजकीय, सामाजिक, आर्थिक किंवा धार्मीक अशा विविध रचना व परंपरामध्ये शोधता येईल. पण कारण काहीही असले तरी तरूणांची उदासीनता व जीवनाकडे पाहण्याची संकुचीत दृष्टी हे सदर स्थितीतील वास्तव आहे. आयुष्याच्या सुरवातीलाच तडजोड म्हणून सुरक्षित पळवाटा शोधणारे तरूण सामाजिक प्रश्नांच्या बाबतीत उदासीन असणारच तर काहीना इच्छा असूनही प्रश्नांना सामोरे जाण्याच्या स्वत: च्या क्षमतेबद्दल शंका असते. संवेदनशीलता, आपल्या कल्पना विश्वातील सुंदर जग वास्तवात दिसत नसल्या बद्दल ची तीव्र अस्वस्थता, आव्हाने स्वीकारणे व ती पेलण्याची धमक असणे ही तारूण्याची लक्षणे आहेत. ही लक्षणे श्रद्धास्थान मानणारे व अंगीबाणवणारे कृतिशिल चिरतरूण समाजाचे भावी नागरीक बनावेत या साठी प्रयत्नरत असणारी अ.भा. लेवा पाटीदार युवक महासंघ ही एक संघटना आहे.

सामाजिक बांधिलकी मानणारे व त्या विचारातुन आयुष्यात काही कृति करू इच्छिणारे युवक – युवती लेवा पाटीदार महासंघाचे सदस्य बनु शकतात. सदस्य होण्यासाठी कार्यकर्त्यास एक शपथपत्र भरावे लागेल. सदस्यता फी वार्षिक सक्रिय सभासद फी रू.१००/- व प्रवेश फी रू.५/- या प्रमाणे एकूण रू.१०५ /- राहील साधारण वार्षिक सभासद फी रू.११/- राहील.

युवाशक्ती हिच समाजपरिवर्तनाचे साधन आहे. युवक आणि युवर्तीनी विधायक कार्यातून व्यक्तिमत्व विकसन, व्यक्तिमत्व विकासातून समाजोन्नतीसाठी संघटीत व्हा असे आवाहन अ.भा. लेवा पाटीदार युवक महासंघ व्यासपीठावरून करण्यात येत आहे. स्वत:चा विकास व सामाजिक काम यांची सांगड घालून अर्थपूर्ण आयुष्य घडवू पाहणाऱ्या सर्व युवक युवर्तीना सदस्य बनण्याचा आग्रह आहे. सदस्य न होताही विविध उपक्रमात सहभागी होणाऱ्यांचे स्वागत आहे.

या पवित्र उदात्त अशा रचनात्मक विधायक कार्यासाठी आपण सारे कटीबद्ध आहोत! या साठी आम्हाला आवश्यकता आहे आपल्या खंबीर, बळकट व प्रेमळ अश्या अमुल्य सहकार्याची! अपेक्षा आहे समाजातील थोर प्रतिष्ठीत व विद्वानांच्या मार्गदर्शनाची व प्रेमळ आर्शिवादाची……..